驛飛颱《去舊友婚禮,會遇到快成婚的前度》

人生,總會遇上幾個… 前度。

若果跟那些前度女友有較為多 Common Friend(如大學中學同學、街坊、舊同事),總有一日,會在一些舊友場合 —— 如婚禮 —— 重遇。去到某個年紀,你就會收到風,對方快將成親。

話說,我之前去兩個朋友婚禮,損友們當然問:我當年的前度也會去,若果她問我去不去其婚禮,我如何應對呢?

夠竟應該點做先最霸氣?定還是扮世故?而驛飛颱真的多損友,他們的答案真係唔知好嬲定好笑:

「好難霸氣側漏㗎喎,一係唔好去,一係好真心咁講恭喜,將左膠底發揮到淋漓盡致」

比人睇穿我大愛包容左膠底添。

「唔使特地打招呼,殺到埋身就一句『恭喜晒,祝你幸福』。霸氣 +5,魅力 +10」

打機咩。

「你估拍戲咁,即刻走馬燈回憶返當年如何相遇相識相愛吵架疏離分手淡忘,然後兩人雙手碰上,一個眼神交換之後緊緊擁住對方然後出 credit 咩?」

點解冇跳起 Yeah 同 BBQ。

「帶埋女朋友」

#首先

「拖兩個靚女出席」

咁又唔難,但我去人婚禮,即係要包三個人情?

「咁咪要多啲報紙做人情?」

係喎咁就解決上面個問題。

「戰場不在朋友婚禮,未去朋友婚禮前,先 FB inbox 恭喜佢,問佢點識未婚夫,兼講埋你同佢未婚夫係點識(一次過講哂),到佢覆你之後,問佢有冇同未婚夫提過你同佢的 History,到時佢應該唔會派帖」

呢位專家好認真。

「你可以上台唱幾首歌 —— 阿牛、婚禮的祝福。我意思係,佢一拎帖出黎,你即時衝上台搶 MC 個 mic」

喂個婚禮係朋友㗎,撞到前度都唔洗攪寸個 party 黎顯示霸氣掛。

「咪又係笑到 sap 熟狗頭咁講『恭喜哂恭喜哂』,可以點 jack」

喊出黎。

「同佢講 今次唔黎,下次先」

嗱,咁就似我喇。

結果…

結果,前度沒有去到個 Common Friend 婚禮。一天都光曬。

  • 驛飛颱, 雜談大懶豬, 化作驛飛颱, 本來言無物, 何懼多感慨?