吳桐山《港台的錢填海好過》

老實申報,我極少極少睇電視。除了工作關係,公司辦公室會睇到新聞台的滾動新聞之外,屋企連電視都無,因為我覺得投資買部電視是「倒錢落海」。審計署這日的報告指出,一年花納稅人 10 億元的香港電台,其電視節目平均收視率只有 0.1 點,相當於只有 6400 名觀眾,完美示範咩叫做「倒錢落海」。

雖然港台變成收視率條數唔系咁計,不過就算不是 6400 名,都不會多得去邊。其實亞洲電視停播前,一年也就燒 3 億元,港台一年燒的錢頂幾個亞視了,不會就好似水花都沒有一個。

港台立場一向偏泛民,尤其是以《頭條新聞》為首的幾個政論節目,反對派將填海譏諷為「倒錢落海」,港台對此都有不少質疑。不過似乎港台自身的問題更大,在大家都用手機來接受資訊的年代,有沒有必要一年花 10 億元去搞個港台呢?當然港台節目也可以通過手機來睇,但隨便一個網紅的觀眾隨時多個港台,投入產出比明顯不成比例。

泛民最中意同填海計數,同「大白象」工程計數,為何從不跟港台計數呢?港台高中低層的工資,都不需要跟收視率掛鈎,話知你有無人睇,反正照出糧。審計署報告出來之後,泛民的莫乃光還繼續為港台辯護,說政府應該給港台提供足夠資源,以免浪費珍貴頻譜;又話增加多些資源給港台分分鐘令政府庫房收入增加。

此說認真荒謬。為何頻譜就要珍惜?講到底,電台、電視台信號都是通過無線電波發射出來,無線電波本身毫無價值,只有承載的內容才有價值。如果內容無人睇,要頻譜何用?何不將頻譜空出來給其他例如航運等用途好過。填海難道不可以增加庫房收入?為何泛民在計算填海的時候,就只計投入不計產出,假設賣地收入是零呢?

不如停咗港台這個「大白象」,十年就可以省下 100 億,足夠填海填多幾十公頃,足夠幾萬人居住,功德無量。

  • 吳桐山,時事評論員。