方海韻《選舉照妖鏡》

昨日出咗陳凱欣團隊抄功課事件,有人 whatsapp 問我信唔信係陳凱欣指示,細心睇完整段文字,唔信囉!理由簡單,一:陳凱欣唔會傻到走去抄對家嘅文件,仲要一字不漏;二,文中頭兩句已經有用詞不當及語法不通的行文問題。而參與過選舉工作嘅人都知道,咁大個項目有乜可能一個人做晒,好多時候義工急起上嚟好多嘢大家都冇為意,車就停在雙黃線啦、衝紅燈、資料未批就攞去印、單張仍然有錯別字等。呢啲真係家常便飯,忙中有錯。今次九西補選,蝦碌野唔少,好似李卓人義工車衝紅燈、劉小麗車違泊、陳凱欣抄功課等,確定都唔係當事人做,但出咗事,唔通要下面班細咩鑊?呀頭認錯,呢啲就叫「有承擔」。

反而呢亦都會睇到其他候選人對對家犯錯嘅一啲做法。好似今次陳凱欣宣傳單落咗黎廣偉比區議會資料,李卓人兩個鐘頭內立即開咪做 live,評頭品足。就係一副「仲捉唔到你黃腳雞」嘅態度。九西之前發生咁多事,又唔見你秒速關注?亦無見過李卓人開 live 講今次參選政綱。真係平時地區有咩事情發生又唔見佢咁勤力,難怪佢論壇嘅時候都會講佢都唔係好關心九西嘅事。好心啦,細嘅無知,但李卓人都 60 幾歲,做過咁多次選舉,唔通真係唔知嗰份野唔會出自陳凱欣手筆咩!黎廣偉梗係食咗偉哥咁興奮喇,大家都知黎廣偉咁嘅質地,在生之年响民主黨都幾難上到立法會大台,而家無端端好似中咗頭簽咁,好似一直被打入冷宮嘅後宮佳麗有機會出位喎。好心比心機進修下,睇佢份文件,又用錯字又錯語法,令人心傷。反觀馮檢基就冇攞呢件事出嚟講,呢啲咪就係君子。

同樣上周李卓人團隊車衝紅燈,傳媒當然大報特報,用顯微鏡報導候選人嘅犯錯,吸引眼球係傳媒生存之道嘛。但係我睇過晒陳凱欣同馮檢基嘅 Facebook 一句攻擊話都沒有說過,唔會承人之危,可能响今個世代大家會覺得佢地好戇居,但呢種人係值得敬佩。就係靜時思已過,做好自己。從人家犯錯而睇到候選人嘅人格,選舉唔知係一塊荒唐鏡定一塊照妖鏡呢?

(立法會九龍西補選候選人包括:馮檢基、李卓人、陳凱欣、伍廸希、曾麗文。)

  • 方海韻,樓未供完、仔未養完的香港小人物。