渾水《如何有效搬錢落香港》

每一次有人來 pitch 合作,有兩件事必須要搞得掂,才有下文。

銀行戶口開到了沒?在香港開銀行戶口,文件多手續煩,甚至有時幾人治,例如你個 RM 同你講,叫你開公司戶口之餘幫到買份保單,佢講得好有技巧架,無話一買保單就包開戶口,但你又不是傻子,聽到都知乜料啦。外資難開戶,中資雖會易開一點,但行政極不合理,我試過公司在無通知無理由的情況下被凍結了,之後我跟銀行講話要投訴至金管局,然後下午就復開了,打電話說搞錯了。

開完戶口後,就要處理錢的問題。因為內地嚴打走資,沒有資金,萬事難行,錢一卡住了,商機白白流失。市場上流行各種不同搬錢方式,有正有邪,甚至由社團組織經營,我只有概念性理解,卻不知實際操作如何。

內保外貸,是銀行層面常見的方法,不過現在已經嚴打了,但有時風聲無咁緊的時候,偶然聽到成功案子。內保外貸可以進化成買賣投資產品,如萬用壽險、債券等,轉一轉方式買賣,又可以間接搬到部分資金落來,不過投資品的手續化、流動性等,是成本考慮。

如果有上市公司,供股搬錢或供股買基金,都係一種可以引資來香港的正規方式,好像海航系公司天價投地就是一例,雖然事與願違,但條橋係值得研究。香港部分證券殼都是這樣子運作。

蛇有蛇路,搬錢落來香港也可涉及一些古靈精怪的操作。新聞提過的「ATM 提款黨」和「螞蟻搬家」的走水貨式搬錢,都涉及人手、組織架構,背後或會由社團控制,有時甚至是由澳門過來、交收。

金融機構如找換店、地下錢莊都係核心搬錢單位,但收費不便宜,雙位數 percentage 收費走唔甩。

信用卡的「銀聯機」又或 Bitcoin 走資都略有聽聞過,現在不少都收緊了,太高調就很容易被打壓見光死了。

搬錢落香港的管制有鬆有緊,有點杜琪峯式警匪片的感覺:當風聲一緊,警察要交數,黑道就配合放幾個小混混、泊車仔交數頂罪,但核心集團無損;到風聲無咁緊,各路江湖英雄又再出來搵食。

走資的需求非常殷切,個個大陸商人口中愛國,但實際都想把資金搬離本國,做多元和多方向投資。風聲一鬆少少,搬錢運動就繼續,香港作為買辦的價值繼續發揮。教科書講香港經濟自由等核心價值、資本自由流動等理論,其實就係講緊這回事。

  • 原載:《Am 730》