田北辰《反對還反對,俾啲似樣的理由得唔得?》

港鐵沙中線多個工程傳出質量問題,相信大家都知道,上星期我提出引用《權力及特權條例》授權俾鐵路事宜小組,傳召沙中線土瓜灣站同會展站的承建商解釋事件,可能係立法會上第一次有建制派動議引用特權法。

動議被否決,我本身都有心理準備,我知道引用特權法好有爭議,我自己都反對過好多次。每個議員都有自己的理由,大部分我都唔同意,但冇辦法啦。

我最介懷的係,有議員竟然話呢兩個站的工程問題唔涉及公眾安全,其中一位議員話糾正咗就冇問題,另外一位仲話「同重大既公眾安全有一段好大距離」。

我真係完全不能苟同。唔知大家記唔記得,幾年前銅鑼灣渣甸街曾經發生路陷,發生的成因就同今日會展站一樣,係支架出問題,點可以話唔涉及公眾安全?!

就算施工期間,都有可能影響地盤工人。工友的安全唔係公眾安全?!

就算唔信我講,政府自己的文件都話,「對於事件可能帶來嚴重的安全隱患,港鐵公司作為項目管理人,並未有盡力確保承建商按設計進行挖掘,運輸及房屋局和路政署深表遺憾」,「土瓜灣站混凝土牆身及會展站臨時支撐工程出現的建造問題,皆未有及時向路政署通報,政府已表明完全不能接受」。

咁都唔係涉及安全?咁都可以當冇事?

我成日都話,反對我的意見唔係問題,但呢啲理由真係好匪夷所思。