渾水《當大灣區成為一個亂吹的概念》

大灣區的吹捧已經到離奇的地步,比一帶一路有過之而無不及,誇張到連主題曲都出埋,由港星領唱。品味這回事難以捉摸,但若有香港人真係會因為大灣區主題曲而北上發展,他腦子大概灌了水,要去睇醫生了。啊,間接也可順道促進一下大灣區的醫療發展,大灣區果真商機無限。

商業世界要吹捧一個概念,通常會濫用 Buzzword。個人最怕聽到 Buzzwords,最怕聽到人用這類花言巧語搵我合作。明明係數據分析工具,硬要老吹 Big data。做金融,寫隻 apps 又話係 Fintech。自動化部分工序,都可以老屈係 AI。好像在創投、金融世界,你話自己做 big data、AI、machine learning、blockchain、fintech,一定有人鳥你。不過,大家心知肚明,成功做到的概念係九死一生,更多的是一種局、一個棚,甚至成為印刷股票炒高股價的絕佳理由。

好像大灣區、一帶一路等吹牛概念,近年已經開始污染金融圈,時常睇通告都見到公司管理層的話硬生生要加一帶一路概念。現在內地殼玩家喜歡買證券業務,通常都會做埋基金,基金又係 sell 一帶一路。

股市喜歡追逐概念,好像這類 Urban planning 概念歷久常新,什麼雄安新區、自貿區、一帶一路、前海特區、大灣區,隔一著又有一個新花款。

永難忘記小學讀書時,中央政府如何吹噓西部大開發。由於名字引人入勝,當時步入青春期的我難得地把這偉大國策深印腦海。起題改名的人別出心裁,藝術成份可媲享負盛名、近期探訪波蘭的「濱洲艦」。

西部大開發是引香港大孖沙的投資的項目,美其名是投資,但實際看不出跟收保護費有什麼分別。黃沙萬里,要有水先可以搞野,無水點開發,咪唯有揼港商心口。

現在「收片」的方法日漸進步,香港主力出錢的高鐵、港珠澳大橋,難道不就是另類進貢嗎?高鐵來回成本不菲,這難道又不是另類陸路入境稅嗎?

以前中央搞西部大開發,搵的是一線大孖沙;現在搞大灣區,推銷的商人轉了樣,不少二線上位做一線,上一代的一線大孖沙出力做醜人甚少。大家都學會明哲保身,低調撤資,少搞政治。也許正面去看待,這叫江山代有人才出,我不怪責現在硬銷的權貴,只是覺得一蟹不如一蟹,少少唏噓咁解。

  • 原載:《蘋果日報》