渾水《四百五十萬的八段錦 App 算貴?》

創科生活基金批逾 450 萬元,資助「八段錦健康遊戲 App」開發,被網民質疑估值過高、利益輸送等,成為趣談。到底 450 萬是否昂貴,是這個討論的重點。

略看過科技界的回應,就會睇到業界如何維護自身利益。我只是旁觀者,沒有對錯判斷。正如我做投資者,如果政府要加印花稅,我作為既得利益者,都反對啦。

科技界都有分建制、非建制陣營,政治上立場不同,今次面對業界共益,卻同聲一氣。很簡單,因為如果大眾覺得 450 萬貴,而這個印象深入腦海,科技界的產品開發就會被壓價,業界不會樂見。

科技界主要論調包括:「科技你識條鐵咩?;450 萬都要睇佢開發咩功能先,我地才能批評;450 萬都覺得貴,難免香港發展唔到創科啦」等。

第一種,批評外行人無知,駁唔到。第二種,這樣推波,都駁唔到。第三種,卻肯定是有邏輯問題的歪理。

我最近有意跟一位 IT 友開發一個 App,純資訊提供平台,因為佢係專業,外行人呃佢唔到,成本大約十萬左右。

平有平做,貴有貴做,如果八段錦到最後又溝 AI、又玩 VR、又玩 Blockchain,咁可能好抵,因為科技這行,有資訊不對稱,海鮮價常見,正如上市黨鍾意呃人上市,都係資訊不對稱。

  • 原載:《都市日報》